مجارات الشاعر لافي بن حمود الغيدانيـ

السلام عليكم ورحمة الله وبركاتهـ







يامكثرين الهرج لااسمع ولااجيب

تريحوا من فضلكم واسمحوا لي

تريحوا لاتلحقون المشاهيب

على الردى ماني شفوق عجولي

بالعقل والصبر ادب النفس تاديب

والا لها مده تصول وتجولي

خلج ترازم في سياج المحاديب

مافيهن اللي بالعقال معقولي

اشد وطية زور من شمخ النيب

اليا ضاع مفعو ل الحيل والحلولي

انا لاقلت ارتب القول ترتيب

حتى يجي كي على فك قولي

اليا ارسلت لافكار القريحه مناديب

ترايعن من عقب ماهن جفولي

لكن مالي من وراها مكاسيب

لو كان عشاق القشر صفقوا لي

مامستفيد الا العدو والاجانيب

ولاني مطيع مقرقعين الطبولي

خليتها تعطي فجوج مجاديب

جربا تجود في رسنها مهبولي

والله لااجنب دام لي درب تجنيب

من شرهة حشام الرفاقه خجولي

لو انها بين النحر والتلابيب

من الحيا وجهي مهوب مغسولي

طبع لنا نشب عليه ونشيب

وطبيعةٍ لعلها ماتزولي

على الجماعه للجماعه مواجيب

الا جهلوا قدر الرفيق الهتولي

ماني على ربعي قريب محاضيب

ادناة مايخليني اسرج خيولي

ان جات من طيب شقاها على الطيب

لو انها اعوج من رقبة الذلولي

وان جات من مسكين منطق واساليب


حطيتها بين الثرى والنعولي

لاحركت شعره ولاطلعت شيب

ولاضيقت صدري ولاطق جولي

وان كان في صبري على ميلهم عيب

العيب تفتيش الصرر والحثولي

لاقمت تذكر في رفيقك عذاريب

وتبين عيوبه لذولي وذولي

صبرك على ربعك علاج وتطابيب

يقصر حبال السالفه لاتطولي

حتى مايلقا في طرفها مقاضيب

كراه خير وللمشاكل ميولي

واليا بليت بتايه شره وصعيب

يقول انا العراف وانت الجهولي

قل الله الله ياحصان الاطاليب

يالفاهم العالم عطيب الفعولي

هذا الكلام اللي مافي صحته ريب

لانيب لاحولك ولانتاب حولي

حصان وبن حصان طيب مجاذيب

وبالمعرفه رجل محلي ودولي

خله يروح يخطي الدرب ويصيب

يقول مابالناس عرضي وطولي

والفرق ماهو باللحى والاشانيب

الفرق بين الناس فرق العقولي

كم واحد تحسن به الظن ويخيب

السن يضحك والفواد معلولي

واللي غدت به كلمة مالها غيب

ماهو من اطيب ربعي اللي غود لي

يالله عساها صيحة في قفا ذيب

وقلع النيا بيني وبينه يحولي

الرجل مايغصب على الطيب تغصيب

اليا صار ماهو دل ضمن الدلولي

ومن عادة اللي طيبه يحضر ويغيب

لاطالت الرفقة زهوق ملولي

واليا بلنك غبر الايام بصحيب

في مستوى طيبه صعود ونزولي

اعرف ترى الدنيا دروس وتجاريب

والكامل الله والنقا للرسولي

لاتصير مشذاب يقص العراقيب

خله وراع الاوله وش يقولي

اخذت حكمه من كلام اللواعيب

للطيب ناس وللعذارى فحولي




وهـذه مجــاراتي لقصيدة الشاعر لافي بن حــمــود الغيداني







اركبتني ياذيب عوج المصاليب

حتى عجز جسمي تشيله رجولي

بديت لك قاف منقى عن العيب

ومعناك معجبني ومالي عدولي

صورتلك تصوير موثوق ومصيب

وأهتضت من ماوحيت وابديت قولي

والقول مايشرح على غير تر تيب

وأنا كثير الصمت ماني فضولي

يابن الرجال مكملين المواجيب

قولك حكيم وقلت قول الاصولي

شرحتلك درس نسوه الدعابيب

عسى ليا سمعوه تصحى العقو لي

أصدق بيان في معانيه تهذيب

وشرواك من مثله يقول ويطولي

وغنيت معجب فيك ومخاوي ذيب

وخوة خوي الذيب مو قف بطولي

وأرسلت لي هجن عليهن مناديب

أرداهن للي من السفايف جفولي

وجات الركاب أقواس مثل العياسيب

وردن على حاضي ورود الصمولي

وصكو مناديبي ببيت المعازيب

قامو مناديبي بصدق و حكو لي

ان جات من طيب عليكم مواجيب

فتح الصدور و مبهمات القفولي

وان جات من مسكين ماله مطاليب

في مفصل الساقين طق الحجولي

والسمع صكه عن خبيث الهناديب

ولاتنشد الحضار هو وش يقولي

خله يعدي راس ضربون وكعيب

جعله يحصل من سرابه سيولي

لو هو كبير السن شيبه مناتيب

سقيم عقل وراي واجهل جهولي

يدلي بحبل كل راسه كلاليب

ويصافق الجيلان حبل الخبولي

ويحد محلاته جليس الخر اعيب

ويسلخ بها جلد الصبور الخجولي

والرجل سبه في غيابه من العيب

طبع قبيح ومن خبيث الفعولي

رمي المقفي طبع شين المشاريب

ولاهو بطبع لي ولاهو ميولي

راحو على الغايب نشاب وعواقيب

وسط المجالس ينكثون الغزولي


ذياب المجالس فرسهم بالمخا ليب

يالله جعل اعمارهم ما تطولي

شذابة المقفي بشلفا تر احيب

أصحاب اخو مره طلوع ونزولي

ان غبت حطو في عيب وشواذيب

وان جيت بالضحك العريض اضحكولي

غزو علينا فوق عوص المناجيب

غزو علينا مثل غزو المغولي

ّروح زمان اهل العجب والتعاجيب

وجانا زمان مفتشين الكفولي

واليوم وقت مشذبين العراقيب

اهل العلوم ا لساقطه فالحثولي

يابغض عيني للقفوش المكاذيب

تملى الحزام ولاعليها تكولي

ان بعتها بارت بسوق الجلاليب

وان شلتها بالجيب كبرة حمولي

وياطيب وقت اهل البيوت المقاطيب

اللي مجالسهم لستر الخمولي

دون الرفيق يجودون المقاظيب


ميزانهم ثابت ولابه ميولي

وضحت ماجربت ياناس تجريب

وبينت يالاجواد مادار حولي

وأنا بشر ماني مصفي غثاريب

والكامل الله مادعي بالكمولي




مع تحيات الشاطري حموودي





تنويهـ القصيدة للشاع ماي فاذر : سعد الشاطري