{{..,بـــــــــــــــــــــلا طف’ـش :) ,,هااام ألحق عمرك قبل لايلحقك..!!

#1 05-25-2009, 02:52 PM

أهلين ::**:: بالجميع..

سبحان الله وبحمده سبحان الله العظيم

السلآم عليكم ~

طفشاااان/هـ .. زهقاااان/هـ -
نفسي في طرف خشمي -
أووووووووف ملل -

بكتب بالعاميه لأني خربتها من البدايه هههههه
!! هذي كلمات (اللي فووق) تقريباً 97% من المجتمع يرددها باختلاف ظروفهم وطبقاتهم
!!"اتوقع الجيل الجديد اول كلمة ينطقها بدل بابا .. راح يقول "بابا طفشان

! طبعاً انا اكتب هالموضوع بعد ليلة مليئة بالطفش والبكاء والعويل والقرف وبدون مثاليات أنا أول وحده
بس لقيت الدنيا ماتسوى وجلست مع نفسي جلسة مطوله دامت اربع ساعات .. وشوفوا النتيجة ..

.
.

سؤال / ليه كل هالطفش والملل؟
.. طبعاً أنت أسأل نفسك هالسؤال وجاوب عليه مع نفسك وراجع حساباتك
!!انا بأجاوب عن نفسي وعن الأكثرية .. وصدقوني هنا الطفش بتلقونه من جد
أول شيء لازم نعرف حقيقتنا .. ووجودنا .. ليش انا موجود ؟؟
(يجيبك الواحد الأحد في محكم آياته .. (وماخلقت الجن والانس إلا ليعبدون

تتوقعون لو اننا عبدنا الله حق عبادته وصرنا 24 ساعه في عبادة بنطفش؟؟
لاتناظروني كذا هههههههه لاتقول مستحييييييييييل 24 ساعه عبادة .. !!
بقولك عن نمط أغلبية الناس !!
أنام 8 ساعات يومياً ===>لو احتسبت هالنوم تتقوى فيه على أعمالك وطلب الرزق
.والصلاة وغيره صار عبادة وطول ماانت نايم الملائكة تسجل حسنات

الأكل 3 مرات ===> تقوية على العبادة وكلوا من الطيبات
ولبدنك عليك حق , يعني القرآن والسنة توصيك تاكل وتقدر تحتسب حتى وانت تعمل دايت وتذكر حديث
.الرسول ثلث لطعامك وثلث لشرابك وثلث لنفسك وهذا اقوى ريجيم عرفته البشرية

أصلي 5 مرات ===> كل خطوة للمسجد بحسنه والعطر اللي بثيابك واستعدادك لمقابلة الله عبادة
.والتدبر والخشوع وكل حركة عبادة

.أضحك نصف ساعه ===> الابتسامه في وجه أخيك المسلم صدقه, يعني عبادة

أروح لصديقاتي ===> أحب الناس إلى الناس إلى الناس أنفعهم للناس
وقوله عليه الصلاة والسلام سروراً تدخله على مسلم يعني ممكن صديقتي طفشانة وانا أغير عليها
جو < شكلك تزيدين الطفش هههههه

أكلم جوال ساعة ويمكن فووق الساعه ===> أسلم ع الوالدة بر الوالدين
أتطمن على شخص مريض بحكم عيادة المريض , أقول السلام عليكم 10 حسنات, أوسع صدر
أحد متضايق ومهموم , أساعد في تفريج كربه << هذي كلها عبادات عظيمة

أطلع الداوم ===> هذي عبادة عظيمة لأن فيه كسب الرزق الحلال
الكف عن سؤال الناس - الاخلاص في العمل - نفع الناس - أجر كل ريال راح تنفقه على أهلك
.ونفسك او تتصدق

طالع بر - رحلة - بحر ===> لأنك تتأمل في عظيم خلق الله
وهذي من أعظم العباردات وهي عبادة الرسل المهجورة-ادخال السرور على نفسك وعلى اللي معك
.تتقوى على العمل والعبادات لانك ترجع نشيط بعد ماتغير جو

.البنت اللي تساعد أمها لها أجر

.المرأة في بيت زوجها لها أجر

.زيارة الجيران والسؤال عنهم ,و ترسل لهم صحن من طبخك اليوم ( ولانفغل توصية الرسول بالجار) لها أجر

.صلة الأرحام ===>هذي فيها بركة في العمر وبركة في الرزق < عشان كذا رواتبنا تطيييير لأننا قاطعينا

رحتي المشغل واهتميتي بنفسك ودلعتيها===>مك اب - لوك جديد
تذكري أن الله جميل يحب الجمال , وأن الله يحب ان يرى نعمة عبده عليه<<بس انتبهي من
.المبالغة وتجاوز الحلال للحرام وخليك معتدلة

راحت فلوسك في عطور ===> تذكري قول الرسول حبب اللي من دنياكم الطيب والنساء
.يعني عبادة وتشبه بقدوتك صلى الله عليه وسلم

.رتبتي بيتك نظفتي غرفتك ===>النظافة من الإيمان

.رفعتي أي شي وشلتيه من الأرض ===> اماطة الأذى عن الطريق صدقة

ذاكرتي دروسك ===>طلب العلم ياطالبااات
هذي النقطة مهمه مررررررررره ترى في الطريق للمدرسة طريق للجنة لاتتأففون حتى لو هي علوم دنيا أحتسبي كل ساعة
مذاكرة وراح تتوفقين بإذن الله

حتى لما تنادي الشخص بأحب اسم له يعتبر عبادة ===>الرسول كان ينادي أحد الصغار ويكنيه
.ويقول له: ياأبا عمير مافعل النغير << هذي وصية لتدليل الاطفال والاهتمام بهم

رحت تجيب أغراض لأهلك لاتتذمر واقرأ هالحديث (من كان في حاجة أخيه كان الله في حاجته) يعني ربي بيقضي امورك لما تساعد الناس على أمورهم فلما أحد يوصيك اترك التذمر وازعجتونا وانتو طلباتكم ماتنتهي وتذكر الحديث ورح بابتسامة حلوووه للسوبر

.
.

اوكـــــــــــــــــــي .. هذي 24 ساعة عبادة ؟؟؟؟
طيب انا معقولة أعبد ربي 24 ساعة ورغم هذا أحس بطفش ؟؟؟؟
.
.

الحين أقولكم الســر الكبيــر رقم (1) في سبب شعورنا بالطفش
(((((((((((((((( النيــــــــــــــــــــــــــــــــــــــــــــــ ه )))))))))))))))))

أول حديث درسناه .. ومقياس جميع الأعمال الظاهرة والباطنة

((ناس تروح الجنة .. وناس تروح النار (وكلهم يعملون نفس العمل) بسبب (((النية
.
.
فيه ناس تحتسب كل الأعمال اللي ذكرناها وتخلص كل حركاتها وسكناتها لله .. فتصبح في عبادة الله 24 ساعة
(وناس تعمل نفس العمل ولاتحتسب ولاتكتب لها حسنات لأنها مانوت هالأعمال لوجه الله .. (هنا يجي الطفش
!!.. أي عمل لغير الله راح يجيب لك (طفش) لأن مافيه حافز داخلي للعمل
.
.

ألحين كلنا نجيب ورقة كبيرة ونكتب هالحديث
.
.

عن أمير المؤمنين أبي حفص عمر بن الخطاب رضي الله عنه ، قال : سمعت رسول الله صلى الله عليه وسلم يقول : ( إنما الأعمال بالنيّات ، وإنما لكل امريء مانوى ، فمن كانت هجرته إلى الله ورسوله ، فهجرته إلى الله ورسوله ، ومن كانت هجرته لدنيا يصيبها ، أو امرأة ينكحها ، فهجرته إلى ما هاجر إليه ) . رواه البخاري و مسلم
.
.

والسطر الثاني نكتب ( كل حركاتي وسكناتي لله رب العالمين) ونعلقها في مكان بارز نشوفها داايم عشان نحتسب وصدقوني مع النية واحتساب كل شي ماراح نتذمر ونتأفف
لأننا عارفين كل شي بأجره

.
.

طيب أنا احتسبت كل أعمالي ومع ذلك أحس بطفش لييييييييييييه ؟؟؟؟؟؟

الحين أقولكم الســر الكبيــر رقم (2) في سبب شعورنا بالطفش برغم أن نيتنا صافيه وأحتسبنا كل أعمالنا لوجه الله !
(((((((((((((((( الروتيـــــــــــــــــــــــــــــــن )))))))))))))))))

!!! للأسف كلنا نعيش بنمط مكرر .. أمس يشبه اليوم .. واليوم يشبه بكرا .. مافي جديد
تدري ليش ؟؟
(لان مافيه أهداف .. (تقدر تبحث عن هالنقطة وراح تلقى أشياء حلوه ودورات تدريبية كيف تحط لك أهداف وتحققها
!! انا باختصار بقولك لازم يكون عندك ((أهداف)) وتسعى لتحقيقها

لازم نسوي جدول بالأعمال المهمة اليومية اللي لازم أتذكرها وانجزها
والأعمال الأسبوعية ,, والشهرية ,, وحتى السنوية
عشان ماتصير كل أيامنا (نسخة طبق الأصل) من بعض .. ومحمد اللي شفته العام هو محمد بعد خمس سنوات
! لازم نسوي شي جديد ونطور انفسنا وننجز ونحقق أهدافنا
.
عندنا اهتمامات .. واجبات .. أشغال .. زيارات .. دورات ..
تبي تسمع شريط .. تقرأ كتاب .. تتدبر آيه .. تحفظ سورة .. تتعلم لغة
!! أي شي .. لازم نرتبها ونحط لها وقت ونلتزم فيه
.
والله والله ياناس طعم الانجاز لذيييييييييييييييذ
!! لما تحقق شي جديد وترتقي بنفسك .. راح تزيد ثقتك بنفسك وتحس بنشوة وسعادة مو ملل وطفش
وتحس يومك ماراح كذا .. لو بس تقضي لبيتكم .. أو تمسح على راس يتيم ..
أو تلعب مع اخوانك وتفرحهم .. تقرأ صفحة من القرآن
تهدي لغيرك شريط أو كتاب
! فيه أعمال كثيرة تخليك تحس انك ( عااايش حياتك صح) مو طفش
.
.
.

طيب أنا احتسبت كل أعمالي ومع ذلك أحس بطفش لييييييييييييه ؟؟؟؟؟؟
وتغلبت ع الروتين وحطيت اهداف وانجازات وفيه ضيقة بصدري وطفش !!؟؟؟
الحين أقولكم الســر الخطير رقم (3) وهذ القاتـــــــــــــــــــــــــــل .. والمدمــــــــــــــــــر .. وسبب ضيق الدنيا وعذاب الآخرة!
(((((((((((((((( الذنـــــــــــوب )))))))))))))))))

الرجاء عدم تجاهل هذه النقطة . فيه ذنب في حياتك .. فيه شيء خطأ ؟
!... خلك صريح مع نفسك مرة وحدة .. واجه نفسك بقوووه .. لاتهرب وتضعف وتقول بعدين

(أكيد فيه ذنب في حياتك .. أو عادة سيئة أو خطأ كبير .. يخليـك تحس بطفـــــش وضيقة وملل !! (راجع نفسك
قال تعالى : (ومن أعرض عن ذكري فإن له معيشة ضنكا ونحشره يوم القيامة أعمى * قال رب لم حشرتني أعمى وقد كنت بصيرا * قال كذلك أتتك آياتنا فنسيتها وكذلك اليوم تنسى) . سورة طه
؟
.
هذا بس جزائك في الدنيا .. ضنك .. فكيف بيكون جزاء الآخرة ؟؟ أسأل نفسك هل هذا الذنب يستاهل تغضب ربي عشانه ؟
هواك والشيطان رضاهم مقدم على رضى ربي ؟؟
تخسر الدنيا والآخره عشان (ذنب) !؟

تبيع الخلود في جنة عرضها السموات والأرض ؟؟
وتشتري الدنيا اللي عمرك فيها مايتعدى كم سنة ؟؟
تتبع شهوتك .. وتتلذذ .. وبعدها طفش ونكد وضيق .. وقبر وجهنم ؟؟!
أياً كان الذنب .. لاتتساهل مع نفسك .. يكفي أنه يغضب ربك
أصدقاء سوء ؟
مسلسلات ؟
مقاطع ؟
مكالمات ؟
محادثات؟
نمص؟
حجاب؟
قاطع أرحامك ؟
عاق لوالديك ؟
متهاوش مع أحد ومقاطعه فوق 3 أيام ؟
تتكبر ؟
تغتاب ؟
تتريق؟
.
.
إلخ
وتذكر هالحديث
عن أبي عبد الله النعـمان بن بشير رضي الله عـنهما قـال: سمعـت رسـول الله صلي الله عـليه وسلم يقولإن الحلال بين وإن الحـرام بين وبينهما أمور مشتبهات لا يعـلمهن كثير من الناس فمن اتقى الشبهات فـقـد استبرأ لديـنه وعـرضه ومن وقع في الشبهات وقـع في الحرام كـالراعي يـرعى حول الحمى يوشك أن يرتع فيه ألا وإن لكل ملك
حمى ألا وإن حمى الله محارمه ألا وإن في الجـسد مضغة
(إذا صلحـت صلح الجسد كله وإذا فـسـدت فـسـد الجسـد كـلـه ألا وهي الـقـلب
!
!

أي شي متردد فيه .. ومو مرتاح .. أكيد خطأ ؟!
!لا تقول انا أسوي الذنب وأنا مرتاح ,, أنت تسويه وتفرح فيه ساعه ساعتين .. بعدها يبدا النكد
الحين فيه بناات كثير وشبااب وماسنجر وهاتك محادثات .. هذا مجروح بواسيه وهذا مسكين ..
وهذي محتاجتني أوقف بجنبها ؟؟؟؟؟
وتقول عااادي .. يعني ماتدري انها حرام ؟؟؟؟؟؟؟؟؟؟؟؟؟؟؟

إن كنت تدري فتلك مصيبة ... وإن كنت لاتدري فالمصيبة أعظم

(لازم يكون عندك مبدأ وقاعدة وتستند على (القرآن والسنة) وقول الرسول عليه السلام (دع مايريبك إلى ما لايريبك
وياكثر الأسئلة .. ياشيخ يجوز التشقير ؟؟
ياشيخ يجوز اغاني بدون موسيقى ؟؟
المشكلة الاسئلة صارت في الأشياء الواضحة .. المحرمات والواجبات ..
! كل الناس تبي أحد يبرر لها الحرام عشان تمشي فيه
ياشيخ يجوز السحر عند الضرورة ؟؟؟
ياشيخ العباية على الكتف أستر يجوز ألبسها << يعني ترى أبي الستر ؟؟؟؟؟؟؟؟؟؟؟؟؟؟؟؟؟؟

!!ياناس اشتروا الجنة .. الجنة حفت بالمكاره .. والنار حفت بالشهوات .. لاتلحقون ورى شهواتكم وتروحوا النار
تخلص من ذنوبك وتحرر من كل عاداتك السيئة والسلبية ..
حتى التكشيره هذي اللي مرسومه على وجهينا والله عادة سيئة
لاتقول مااقدر .. أنت تقدر والله .. بس يبي لكل عزيمة واصرار وتحدي للشيطان
الحين تخلص من كل شي يذكرك بالذنب ..
قطع الأشرطة المحرمة ..
امسح الارقام اللي بجوالك ..
وديليت ع الجنس الثاني اللي بالماسنجر
ارمي الملابس الحرام .. .. !
(لاتتردد يمكن ماتجيك فرصة ثانية .. يمكن هذا آخر انذار .. (الدنيا والله ماتسوى

.
.

فيه فكرة أنا سويتها جمعت فيها كل اللي ذكرته فوق ..
شريت ستاند (الفلين) اللي نعلق عليها الأوراق .. وحطيته بمكان قدامي وواضح بالبيت ..
.. جبت لي ورقة وسويت جدول بأهم الأعمال اللي انجزها كل يوم وأهدافي وعلقتها
(وكل ماانجز شي من الجدول أحط قدامه (صح

وورقة ثانية كتبت فيها الأشياء السلبية والذنوب اللي صارت عادة يومية بحياتي .. وعلقتها
.. وحطيت كم حديث وآية تحفزني على تركها

مثلاً كتبت (اذكروني اذكركم) عشان اذكر ربي بكل وقت
ربي ارحمهما كما ربياني صغيرا) عشان أدعي لأمي وأبوي)
صيام الاثنين والخميس
قيام الليل لو ليلة واحدة بالاسبوع
ورد يومي من القرآن ... إلخ

وكل واحد يشوف وش يحتاج ويعلقها .. لانك راح تنسى
لازم تحطها قدامك أقل شي شهر تتعود عليها .. وكل ماتبي تكسب عادة جديدة علقها
صدقني راح ترضي ربك .. ومن رضاء ربك عليك .. تحس انت بالرضاء عن ذاتك

.
.

.. ودائماً خلك انسان ع (الفطره) وصدقني بترتاح وتحيا حياة مطمئنة
.. لاتخلي الليل نهار والنهار ليل لان الجسم له نظام لابد يمشي عليه
!!.. وتاكل ألف مره باليوم .. وتشرب غازيات وتكثر مقليات ودهووون وتقول كسلاان احس باكتئاب
وتنام القايلة بالمغرب ؟؟
رتب حياتك كلها من جديد .. النوم .. الاكل .. وكل شيء تسويه أسأل نفسك صح أو خطأ ؟؟
بيفيدني او بيضرني ؟؟
...................

.
....

:بكذا انت راح تسوي اشياء بسيطة
(1) النية والاحتساب لكل عمل.
(2) الأهداف والانجازات اللي راح تحققها في حياتك.
(3) التخلص من الذنوب والعادات السلبية السيئة.

.
.
((لاتخلي هالمتصفح يمرمثل أي رسالة .. أطبعها .. علقها قدامك .. أقراها مرتين وثلاث .. و((قرر
ولا تخليها توقف عندك .. فيه ناس والله طفشانه .. قاعده ع النت ...بالساعات من الطفش

الحمدلله الذي بنعمته تتم الصالحات
... وتذكر النعم اللي انت فيها
!..وارفع يدك واحمد ربك
..
وتذكر هالدنيا ماتسوى عند الله جناح بعوضه
.
.

وقولها بكل قووووه وعلقها بكل مكاااااااان

...

بلاطفش)) والله ماتسوى))

......

بقيتم مع : la,vie

..

#2 05-25-2009, 03:39 PM

فعلا ماتسوى لكن كيف نتعايش مع الروتين الممل
يعني ذكرتي اشياء فعلا من المسببات للطفش واولها البعد عن الله

لكن ربك ييسرها لنا ويفرج همومنا وهمومكم

تقبلي تحياتي . ..

#3 05-25-2009, 03:39 PM

فعلا ماتسوى لكن كيف نتعايش مع الروتين الممل
يعني ذكرتي اشياء فعلا من المسببات للطفش واولها البعد عن الله

لكن ربك ييسرها لنا ويفرج همومنا وهمومكم

تقبلي تحياتي . ..

#4 05-26-2009, 03:18 PM

اقتباس:

فعلا ماتسوى لكن كيف نتعايش مع الروتين الممل
يعني ذكرتي اشياء فعلا من المسببات للطفش واولها البعد عن الله

لكن ربك ييسرها لنا ويفرج همومنا وهمومكم

تقبلي تحياتي . ..

*جريح ينبع*

الله يعطينا على قد نياتنا ...

ويحسن نفسياتنا..

وسّلم الله مرورك..

#5 05-26-2009, 04:57 PM

موضوع رائع
كلمات مغلفة بالذهب
الحياة
جميل ماكتبت
فأنتي عنوان للابداع

#6 05-26-2009, 05:05 PM

اقتباس:

موضوع رائع
كلمات مغلفة بالذهب
الحياة
جميل ماكتبت
فأنتي عنوان للابداع

*لمعة الماسة*

بريق لمعان قلمك ..

قد جر محبرتي ..

فجااااادت...وأعطت..

....

#7 06-09-2009, 01:26 AM

ما اقول إلا
جعله الله في ميزان حسناتك
ونفع به من قرأه

شكراً لكِ

* سي يو *

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري